Yeh gham kya dil ki aadat hai? nahi to
Kisi sey kuch shikaayat hai? nahi to
Hai wo ik khwab-e-betaabeer us ko
Bhula dene ki neeyyat hai? nahi to
Kisi ke bin, kisi ki yaad ke bin
Jiye jaane ki himmat hai? nahi to
Kisi soorat bhi dil lagta nahi? haan
To kuch din se ye haalat hai? nahi to
Tujhey jis ney kaheen ka bhi na rakha
Wo ik zaati si wehshat hai? nahi to
Tere is haal par hai sab ko hairat
Tujhey bhi iss pe hairat hai? nahi to
Hum aahangee nahi dunia sey teri
Tujhey is par nadaamat hai? nahi to
Hua jo kuch yehi maqsoom tha kia?
Yehi saari hikaayat hai? Nahi to
Azeeyyat naak umeedon sey tujh ko
Amaan paane ki hasrat hai? nahi to
Tu rehta hai khayaal O khaab mein gum
To is ki wajh fursat hai? nahi to
WahaaN walon se hai itni muhabbat
YahaaN walon sey nafrat hai? nahi to
Sabab jo is judaai ka bana hai
Wo mujh se khoobsoorat hai? nahi to
No comments:
Post a Comment